مرحبا كيفكم 

زي منتو عارفين احنا بشهر نوفمبر واشهر حدث يسير بهالشهر هو البلاك فرايداي

 واغلب محبين التسوق يترقبو هاليوم بكل حماس واستعداد
قبل كم يوم سىئلتكم بالانستقرام اذ عندكم استفسارات حول البلاك فرايدي اكتبولي هي وبجاوبكم عليها

فان شاء الله في هالبوست راح اجاوب على اغلب التساؤلات اللي ممكن تنطرح حول هالموضوع وكيف ممكن تستفيدي من العروض اللي تنزل وايش اشهر المواقع اللي ممكن تطلبي منها

اصريت انزل الموضوع هاليومين ومانتظر قرب البلاك فرايداي علشاان ترتبو اموركم بوقت قبل الزحمة بالاضافه ان بعض المواقع من بداية نوفمبر قاعده بتنزل عروض وتخفيضات فحبيت تلحقو عليها اممكن تناسبكم 

موعده اخر جمعه بشهر نوفمبر من كل سنه وحيكون هالسنه يوم ٢٤ نوفمبر  

عروض وتخفيضات توصل لـ ٥٠٪ و ٧٥٪ في المحلات بامريكا واوربا ومواقع الشراء من النت في كل المجلات ، الكترونيات ، اثاث ، اكسسوارات بيت ، ملابس ، شنط ، احذية ، بيوتي ، كل شي ينزلو عليه عروض استعداد للكريسميس والنيويير 

** البلاك فرايدي تخفيضات في المحلات ومواقع الانترنت بس نصيب التخفيضات يكون اكبر في المحلات من مواقع الانترنت علشان كذا نشوف الحفله والمضاربات اللي تسير بهاليوم قدام المحلات بامريكا واوربا

** اما السايبر موندي فهو مخصص فقط لمواقع الشراء من الانترنت علشان كذا ممكن تكون العروض والتخفيضات اكبر في هاليوم من البلاك فرايدي 

اولا: اهم شي لازم تسويه انك تجهزي لسته بايش انتي تبغي وايش محتاجة وومكن تطلعي فيه بسعر لؤطه علشان مايسير عندك الوضع خلطبيطه وماتطلعي من هاليوم بفايده 

ثانيا:  سجلي بكل المواقع اللي حابه تتسوقي منها من الان لو ماكنتي مسجله قبل كذا وابدأي اتسوقي وحطي القطع اللي اخترتيها بالويش ليست او الفيفورت علشان تختصري على نفسك الوقت ويومتها تتفرغي فقط للشراء بالاضافه ان هالخطوه حتخليكي تعرفي ايش العروض اللي راح تنزلها هاذي المواقع برساله على ايميلك منهم بالاضافه كمان ان حتخليكي تعرفي التخفيضات السريه اللي ماتكون ظاهره الا للي مسجلين في الموقع

ثالثا:  بعض القطع ممكن تكون متكرره في اكثر من موقع يعني مثلا لو كنتي مقررة على شنط من Celine   !!!

حاولي تمري على اغلب المواقع الموثوقه واللي حتوفرلك الشنطه وحطيها في الويش ليست في كل المواقع ولما تبدأ تنزل العروض قارني بين السعر والشحن واختاري الموقع اللي يقدملك العرض الافضل ، او استخدمي موقع www.shopstyle.com للمقارنه 

زي ماقلت يرجع لاهتماماتك واحتياجاتك واللسته اللي حتسويها لنفسك
يعني مثلا انا علشان قريب مغيرة غرفتي فمن الاشياء اللي قاعده بطالع فيها اكسسوارات للمكتب والتسريحه وكماليات للغرفة، انتي مثلا ممكن يكون عندك اهتمامات تصويريه فشوفي العروض اللي حتنزل عالكاميرات وملحقاتها  ، او ممكن يكون اهتمامك مقتصر عالميك اب فقط فلاتفوتي عروض الميك اب

غالبا اقوي العروض تسير عالاجهزة الالكترونية ، الشنط ، تلفتني دايم الهولدي سيت اللي ينزلونها كل سنه للبيوتي احس فرصة تجربي منتجات جديده 

اغلب المتاجر الكبيره والصغيره ينزلو تخفيضات وعروض في هاليومين  راح اذكرلكم اشهرهم والموثوقين سواء كان لي تجربة معاهم من قبل او لا
(اضغطو عالصورة علشان ينقلكم للموقع)

 قائمة المواقع قابلة للتحديث ، اغلب المواقع راح تبدأ تعلن عن عروضها للبلاك فرايداي والسايبر ماندي بعد ٢٠ نوفمبر سو خليكم قريبين وان شاء الله راح اشاركم العروض بحسابي بتويتر والانستقرام اول بآول

ان شاء الله يكون الموضوع مفيد لكم واكون جاوبت على اغلب تساؤلاتكم
لاتبخلو على اي احد عندو استفسارات عن هالموضوع انكم تشاركوه الموضوع 

 اذ عندكم استفسارات ثانيه او معلومات ممكن تفيد الكل اكتبوها تحت

Hope You Like't

See You Soon